मकवानपुर क्षेत्र नम्बर २ बाट नेकपा एकीकृत समाजवादीका विरोध खतिवडाले उम्मेदवारी दर्ता गराएका छन् । उनीसँग प्रतिस्पर्धामा गर्न मनोनयन दर्ता गराएका छन्, एमाले युवा नेता महेश बर्तौलाले । विगतको सम्बन्ध हेर्ने हो भने उनीहरु गुरु-चेला हुन् । कुनै समय नेता-कार्यकर्ताका रुपमा रहेका उनीहरु अब प्रतिस्पर्धीका रुपमा होमिने छन् ।
बर्तौला तिनै व्यक्ति हुन्, जो २०७४ को प्रतिनिधिसभा चुनावमा खतिवडालाई जिताउन खटिएका थिए । खतिवडाकै ‘स्कुलिङ’बाट विद्यार्थी राजनीति गर्दै बर्तौला अनेरास्ववियुको केन्द्रीय उपाध्यक्षसम्म भए । बर्तौला विद्यार्थी राजनीतिबाट अलग्गिएको १ वर्षमै संसदीय चुनावको टिकट पाउने भाग्यमानी सावित भए । उनी २ असोज २०७८ मा ऐन महरसँगै विद्यार्थी राजनीतिबाट अलग्गिएका थिए । बर्तौलाले विद्यार्थी राजनीतिको आधार मकवनपुरमै बनाएर काठमाडौं आएकाले भूगोलको राजनीतिमा भिजिसक्न पाएका छैनन् ।
मकवानपुरका एक एमाले नेताका अनुसार बर्तौलाले यति छिट्टै संसदीय चुनाव लड्ने अवसर पाउनुमा विरोध खतिवडाले एमाले परित्याग गर्नु नै मुख्य कारण हो । ‘विद्यार्थी राजनीतिमा रहँदा उहाँले ओली गुट समात्नुभयो’, ती नेताले भने,’ओली गुटका दोस्रो तहका नेतासँग सम्बन्ध बनाएका कारण भूगोलमै बसेर राजनीति गरिरहेकाहरुलाई पन्छाएर उहाँले अवसर पाउनुभयो ।’
मकवानपुरको भीमफेदी गाउँपालिका भीमफेदी-९ नामटार घर भएका बर्तौलाले अनेरास्ववियुको इलाका कमिटीबाट विद्यार्थी राजनीति थालेका थिए । उनी मकवानपुर बहुमुखी क्याम्पसमा अनेरास्ववियुका तर्फबाट २ कार्यकाल स्ववियु सभापति निर्वाचित भए ।
उनीसँगै विद्यार्थी राजनीति गरेका एक एमाले नेताका अनुसार खतिवडा २०७४ मा चुनावमा होमिँदा बर्तौला प्रचारकको भूमिकामा थिए । ‘हामी विद्यार्थी राजनीतिमा हुँदा विरोध खतिवडा लेखा विभागका सदस्य तथा पूर्व सांसदको हैसियतमा आएर धेरै पटक राजनीति तथा संगठनात्मक प्रशिक्षणहरु दिएको याद ताजै छ’, उनले भने ।
बर्तौला २ कार्यकाल अनेरास्ववियु मकवानपुरको जिल्ला अध्यक्ष समेत भएका थिए । त्यतिबेला पनि खतिवडा र उनकी पत्नी तथा एमाले नेता मुनु सिग्देलले बर्तौलासहितका तत्कालिन जिल्ला तहका विद्यार्थी नेताहरुलाई पटक-पटक प्रशिक्षण दिने गरेका थिए ।
बर्तौलाको घर नामटार विरोध खतिवडाकै निर्वाचन क्षेत्र मकवानपुर-२ मा पर्ने भएकाले उनीहरुबीच संगठनात्मक रुपमा पनि सहकार्य हुने गरेको थियो ।
नेकपा एमाले नगर कमिटीका सचिव बोलबहादुर कार्की बर्तौला र खतिवडा जनआन्दोलनका बेला एकैपटक हिरासतमा थुनिएको स्मरण गर्छन् । एमाले मकवानपुरको जिल्ला अधिवेशन ताका एउटा भेटमा खतिवडाले अनेरास्ववियुको जिल्ला अध्यक्ष रहेका बर्तौलाबारे भनेको कुरा उनलाई अहिले पनि उनलाई झलझली याद छ ।
उनी खतिवडा र बर्तौलाको विगतको समबन्धलाई गुरु-चेला या नेता-कार्यकर्ता जे नाम दिए पनि फरक नपर्ने बताउँछन् । खतिवडा र बर्तौलाबीचको व्यक्तिगत सम्बन्ध सुमधुर रहेको भन्दै कार्कीले चुनावी प्रतिस्पर्धा मित्रवत हुने बताए ।
खतिवडा यसपटक पनि निर्वाचित भए पाँचौं पटक सांसद बन्ने भाग्यमानी सावित हुनेछन् । २०७४ सालको निर्वाचनमा खतिवडाले कांग्रेसकी नेता महालक्ष्मी उपाध्याय डिनालाई ११ हजार ९६३ मतान्तरले हराउँदै जित हात परेका थिए । खतिवडाले ४४ हजार ७४४ मत ल्याएका थिए भने पराजित भएकी डिनाले ३२ हजार ६ सय ८१ मत ल्याएकी थिइन् ।
योसँगै उनी चौथोपटक सांसद बनेका थिए । उनी १८ वर्षपछि फेरि संसदमा फर्किएर स्वास्थ्य तथा जनसंख्यामन्त्रीसम्म बने ।
खतिवडा ०४३ सालमा राष्ट्रिय पञ्चायतमा एमालेका तर्फबाट जनपक्षीय उम्मेदवार बनेका थिए । तर, हारे । त्यसपछि खतिवडा ०४८ सालमा जनमुखी नेता रुपचन्द्र विष्टलाई पराजित गर्दै सांसद बने । ०५१ को मध्यावधि निर्वाचनमा खतिवडाले कमल थापालाई हराए । ०५१ सालको मध्यावधि चुनावमा पनि खतिवडाले डिनासँग प्रतिस्पर्धा गरेका थिए । तर, कांग्रेस सो चुनावमा तेस्रो भएको थियो ।
०५६ सालको चुनावमा पनि खतिवडाले तत्कालीन माले नेता हिरण्यलाल श्रेष्ठलाई हराएका थिए । अहिले उनका सामु उनै चेला महेश बर्तौला प्रतिद्वन्द्वीका रुपमा छन् । सत्ता गठबन्धनका तर्फबाट उम्मेदरवार बनेका खतिवडा र एमाले-राप्रपा गठबन्धनकामा बर्तौलाबीचको चुनावी भीडन्त रोचक हुने निश्चित छ ।