हेटौंडा गोल्डकपबाट २१ लाख बचत

चौथो संस्करणको स्थानीय तह सहिद स्मृति राष्ट्रिय हेटौंडा गोल्डकप फुटबल प्रतियोगिताको हिसाबकिताब सार्वजनिक गरिएको छ । आयोजक मकवानपुर जिल्ला फुटबल संघले सोमबार हेटौंडामा पत्रकार सम्मेलन गरी जेठ १९ देखि ३० सम्म हेटौंडामा सम्पन्न प्रतियोगिताको आयव्यय सार्वजनिक गरेको हो ।

प्रतियोगितामा करिब १ करोड ३१ लाख ५६ हजार आम्दानी भएकोमा १ करोड ९ लाख ६७ हजार रुपैयाँ खर्च भएको थियो । अध्यक्ष टीका लामाका अनुसार २१ लाख ३६ हजार रुपैयाँ बचत छ भने अझै २ लाख ५१ हजार रुपैयाँ उठ्न बाँकी छ ।

गोल्डकपबाट बचत रकममध्ये ५ लाख रुपैयाँ प्रतियोगिता सञ्चालन भएको स्थान पिप्लेक्याम्पा रंगशालालाई हस्तान्तरण गरिनेछ । प्रतियोगिताका लागि प्रदेश खेलकुद विकास परिषद्ले ४२ लाख, हेटौंडा उपमहानगरले २४ लाख, हेटौंडा स्कुल अफ म्यानेजमेन्ट ७ लाख र टिकटबाट २२ लाख रुपैयाँ संकलन भएको थियो ।

प्रतियोगिताको पुरस्कारमा २८ लाख, खेलाडी तथा रेफ्री भत्तावापत् ३८ लाख, प्रचारप्रसार तथा चौर व्यवस्थापनमा १० लाख रुपैयाँ खर्च भएको आर्थिक संयोजक सुनील लोप्चनले जानकारी दिए । विजेता त्रिभुवन आर्मी क्लबले १५ लाख र उपविजेताले १० लाख रुपैयाँ जितेका थिए ।

‘पुरस्कार राशि र खेलाडीको भत्ता बढाएका कारण खर्च अलि धेरै देखिएको हो । प्रतियोगितामा १२ टोलीको सहभागिता थियो । वर्षाका कारण खेल पनि प्रभावित भयो,’ हिसाबकिताब सार्वजनिक गर्दै महासचिव छवि सुवेदीले भने । उनले आगामी प्रतियोगितालाई थप व्यवस्थित गरिने बताए ।