हेटौंडा १९ सानान्टारमा रहेको तपोवन यूथ क्लवको आयोजनामा ‘दोस्रो तपोवन कप खुला फुटबल प्रतियोगिता’ आयोजना हुने भएको छ ।
तपोवन टोल विकास संस्थाको प्रायोजनमा दशैं तिहारको पूर्व सन्ध्यामा एट ए साइड खुला फुटबल प्रतियोगिता आयोजना गर्न लागिएको हो । फुटबल प्रतियोगिता यही असोज १६ गतेबाट सञ्चालन हुने क्लवका सुमन पाख्रीनले जानकारी दिए । सानान्टारको बगरमा निर्माण गरिएको नयाँ खेल मैदानमा हुने प्रतियोगिताको तयारीलाई तीव्र पारिएको छ ।
चाडपर्वको शुभकामना आदानप्रदानसहित खेलाडीहरुको बीचमा भ्रातृत्वको सम्बन्ध स्थापनाका लागि प्रतियोगिता आयोजना गर्न लागिएको उनले बताए । आयोजक क्लवका सरोज विष्टका अनुसार प्रतियोगिताको विजेताले ५० हजार ५५५ र उपविजेताले २५ हजार ५२५ रुपैयाँ नगदसहित ट्रफी, मेडल र प्रमाणपत्र प्राप्त गर्नेछन् ।
यस्तै विधागत उत्कृष्ट खेलाडी र प्रशिक्षकलाई नगदसहित ट्रफीको व्यवस्था रहेको छ । हरेक खेलको म्यान अफ द म्याचलाई पुरस्कार प्रदान गरिनेछ । प्रतियोगितामा सहभागी हुन चाहने क्लवले ५ हजार रुपैयाँ दर्ता शुल्कसहित असोज १४ गते बेलुकासम्म आयोजक समक्ष सम्पर्क गर्नुपर्ने बताइएको छ । यसअघि भएको पहिलो संस्करणको तपोवन कप फुटबलको उपाधि आयोजक तपोवन यूथ क्लवले नै जितेको थियो ।
